Aizawl khawchhung kawng Oct ni 30 atangin siamthat a ni dawn- PWD Minister

by News Editor

Tualchhung News

ZORAM TODAY| 29th September, 2025: Vawiin hian ZPM chuan an party office-ah chhung inkhawm an nei a, thu sawitu PWD Minister Vanlalhlana chuan, “October 30, 2025 atangin Aizawl khawpui kawng siamṭhat hna ṭan a ni dawn a, Aizawl leh Lunglei inkar kawng pawh hma kan la zui nghal ang,” a ti.

Vanlalhlana, PWD Minister chuan, “Hun rei tak Aizawl khawpui kawng major repair ni tawh lo hi ṭha takin kan siam dawn a, tuna Bawngkawn kawng ṭha tak kan hmuh ang hian siam vek kan tum, Oct.30, 2025-ah hna tan a ni dawn a, Hot Mix Plant hmun hnih PTC Lungverh leh Lengpuiah din a ni a, kawngpui pawimawh laia hman tur phei chu Silchar lung tha lak luh kan tum. Bituminous Concrete a ni a ni dawn a, Aizawl to Lunglei road pawh kan ngai pawimawh a, kan thawk chhumzawm ang,” a ti.

PWD Minister chuan, “PWD hna ber ber chu kawng siam leh enkawl a ni a, sorkar building sak leh enkawl kan hna a ni bawk. Mizoramah State PWD-in National Highway 690.97 km kan enkawl a, State Highway 252 km kan enkawl bawk a. Aizawl khawpui kawng (motor kal theihna chin) 383 km, district kawng 1022 km, MDR 834 km, ODR 848 km, Village road 1703 km, PMGY laih kawng 936 km te awmin, Mizorama kawng kan neih chu a vaiin 6610 km a ni," a ti.

Minister chuan, Heng bakah hian BRO enkawl kawng 915 km a awm bawk. PMGSY avangin Mizoramin kawng kan neih belh nasa a, chuti chung chuan India ram road density atanga chhutin kan la nei tha tawk lo hle a, Mizoram hi square kilometre 100-ah 46.37 km kan nei a, national level-ah chuan 116 km a ni thung. Chuvangin, India ram pumpui ngaihtuahin Mizoramah kawng kan nei chau hle a ni, a ti.

"Kan lu tihaitu ber chu Vairengte atanga Sairang inkar kawng niin hei hi kan sawi tawh thin angin NHIDCL-in a enkawl a ni. Chutiang chu ni mah se Kolasib leh Kawnpui inkar leh Khamrang leh Sairang inkar kawng te Mizoram sorkarin contractor-te ruaia hna a thawh mek lai a ni a, NHIDCL-in heng kawng siam hna hi la mah se a laklawh lai kawng siam hna kan kalpui reng tho a ni. Laih zawh a nih hnuah NHIDCL-in an enkawl zui ta mai si lo va, enkawltu nei lo ang main a awm hman ta a. Fur pui a lo thleng a, kawng a chhe chho zel a, harsatna kan tawk ta a ni,” Minister chuan a ti.

Vanlalhlana chuan, “Harsatna mipuite’n kan tawh takah chuan sorkar kan che lo thei lo va, nikumah pawh harsatna lian tak kan pal tlang thei a, NHIDCL kuta awm a nih miau avangin a siam that hna pawh an thawh tur a ni. Chuti chung chung chuan Mizoram sorkar chuan Finance Department-ah a siamna tur cheng vaibelchhe 9 kan dil a, kan dawng thei mai ta lo va, department sum ringawt hmang chuan he kawngpui hi enkawl sen a ni lo," a ti a.

"Mahse, sorkarin a ngai pawimawh em em a, kei ngei pawh zan riak meuhin ka thawk chhuak a, kan Minister leh MLA-ten nitin inchhawkin an vil reng a, PWD lama thawktuten riah chilhin theih tawp tak meuh meuh an chhuah reng bawk a ni. Tun thleng hian kan ngaihsakin kan la buaipui reng a, chak lakna a buaithlak em em a, Mizoramah duh khawp hmuh tur a awm mang lo. Labour tur thlengin mamawh leh duh khawp hmuh tur an vang em em ," a ti a.

PWD Minister chuan, "Heng zawng zawngah hian mawhphurtu chu kan ni a; mahse, mawh kan phurh dan erawh ka sawi tak angin a zavai chuan a ni lo. Kawng tha siam turin khaw tha kan mamawh a, hei hi kan harsatna leh buaina lian ber niin thal hun kan thleng chho ang a, kan kawng te pawh a tha chho tawh turah ka ngai. Rs.137.87 lakh kan seng ral tawh a, tunah hian Rs.100 lakh kan dil belh leh mek a, Kawnpui leh Khamrang inkar leh Khamrang leh Sairang inkar kawng siam tha vek tur chuan Rs. 500 lakh kan mamawhin kan hria,” a ti bawk.